საქართველოში ჩაის კულტურის გაჩენა საინტერესო მოვლენებს უკავშირდება. ყველაფერი 200 წლის წინ დაიწყო, როდესაც გურიის სამთავროს უკანასკნელმა მმართველმა, რეფორმატორმა მამია V გურიელმა (1809-1826) სოფლის მეურნეობის სექტორის გარდაქმნა გადაწყვიტა.

  • პირველი ნერგები: მამია V დაუკავშირდა ფრანგ ბოტანიკოსებს, ანდრე და ფრანსუა ანდრე მიშოებს (რომლებმაც 1799 წელს ჩაი აშშ-ში შეიტანეს). მათი რეკომენდაციითა და შოტლანდიელი აგრონომის, იაკობ მონტეგიუ მარის დახმარებით, მთავრის ბოტანიკურ ბაღში პირველი ჩაის ბუჩქი გაშენდა.
  • ინდუსტრიის აღზევება: 1861 წელს პირველი ქართული „ბაიხის“ ჩაი დამზადდა, ხოლო 1885 წელს პირველი ექსპორტი განხორციელდა ევროპაში.
  • ოქროს ხანა: 1980-იანი წლებისთვის საქართველოს ჩაის ინდუსტრიაში 190 ათასი ადამიანი იყო დასაქმებული. 70 ათას ჰექტარზე გაშენებული პლანტაციებითა და 133 ათასი ტონა მზა პროდუქტით, საქართველო მსოფლიოში მეხუთე უდიდესი ჩაის მწარმოებელი გახდა (ინდოეთის, ჩინეთის, იაპონიისა და შრი-ლანკის შემდეგ).

საქართველოს ბუნებრივ-კლიმატური პირობები - მთის სუფთა ჰაერი, კამკამა მდინარეები და ტემპერატურის ცვალებადობა განაპირობებს ეკოლოგიურად სუფთა პროდუქტის მიღებას, რომელიც არ საჭიროებს პესტიციდებსა და ჰერბიციდებს. ქართველმა მეცნიერებმა სელექციური გზით 16-ზე მეტი უნიკალური, ყინვაგამძლე ჯიში გამოიყვანეს.

„გურიელი“  ქართული ჩაის თანამედროვე ეპოქა

საუკუნოვანი მემკვიდრეობის აღორძინების იდეა 2008 წელს გაჩნდა, ხოლო 2010 წელი ინდუსტრიისთვის გარდამტეხი აღმოჩნდა  ბაზარზე გამოჩნდა ბრენდი „გურიელი“. დღეს კომპანიის ნედლეულის ბაზა გურიის, სამეგრელოსა და იმერეთის მთიან ზონაში 500 ჰექტარზე მეტ პლანტაციას აერთიანებს. „გურიელის“ მიერ წარმოებული უმაღლესი ხარისხის პროდუქცია წარმატებით გადის ექსპორტზე აშშ-ში, კანადაში, გერმანიაში, საფრანგეთსა და სხვა მრავალ ქვეყანაში.

სკიჯი • ადგილობრივი წარმოება და გასტრონომიული გამოცდილება

გურიაში ჩაის ტურის დაგეგმვისას, თქვენი მთავარი აღმოჩენა ჩოხატაურის მუნიციპალიტეტის სოფელ ხიდისთავში მდებარე საოჯახო საწარმო „სკიჯი“ უნდა იყოს (სკიჯი ხმელი ყურძნის ძველქართული სახელწოდებაა). ეს არის ეკო-მეგობრული, ავთენტური სივრცე, სადაც 200-წლიან გურულ ოდაში ტრადიცია და ნატურალური გემოები ერთიანდება.

აქ თქვენ არ ხართ უბრალოდ სტუმარი - თქვენ ხდებით ტრადიციული გურული ოჯახის ნაწილი.

რას გთავაზობთ სკიჯი?

  • უნიკალური ხილის ჩაი: შავი და მწვანე ჩაის, ასევე მოცვის ფოთლების კუპაჟი სხვადასხვა ჩირთან ერთად.
  • უმაღლესი სტანდარტები: პროდუქცია მზადდება შაქრისა და მინარევების გარეშე, დიასახლისის უნიკალური ტექნოლოგიითა და HACCP-ის სტანდარტის სრული დაცვით.
  • საწარმოო პროცესში ჩართვა: სტუმრებს შეუძლიათ უშუალოდ მიიღონ მონაწილეობა ხილის კრეფაში, ჩირის შრობასა და ბუნებრივი მასალებით შეფუთვის მასტერკლასში.
  • დეგუსტაცია: დააგემოვნებთ სხვადასხვა სახეობის ჩირის მიქსს (ხურმა, ქლიავი, მანდარინი, კივი), ფუნქციურ კანფეტებს (ფიტნეს, დიაბეტური) და საოჯახო მურაბებს.

„სკიჯიში“ ოთხივე სეზონი განსხვავებული თავგადასავალია: ზამთარში აქ გურული კალანდის ტრადიციები ცოცხლდება, გაზაფხულზე ჩირიანი პასკების სურნელი ტრიალებს, ზაფხულში ხილის შრობის პროცესი დუღს, შემოდგომაზე კი რთველის ხალისი გელოდებათ. საწარმო სრულად ეკომეგობრულია და იყენებს მზის პანელებსა და წყლის ბიოგამწმენდ სისტემებს.

მოგზაურობა პლანტაციიდან ჭიქამდე

გურიის ჩაის მარშრუტი არ იქნება სრულყოფილი სხვა გამორჩეული საწარმოების მონახულების გარეშე, რომლებიც საუკუნოვან ცოდნას თანამედროვე ინოვაციებს უხამებენ:

  • TabaTea (ტაბა): ეს საწარმო 13 უნიკალურ პროდუქტს ქმნის, მათ შორის წლის პირველ, ნატიფ „მაისის ხელნაკრებ ჩაის“. აქ ტრადიციულ გემოებთან ერთად შეხვდებით ვეგანურ ჩაის შოკოლადს და ექსკლუზიურ ჩაის კონიაკსაც კი.
  • ანასეულის ჩაის კომპანია: ადგილი, სადაც ისტორია ცოცხლდება. გადმოცემის თანახმად, ეს ულამაზესი მამული მამია გურიელმა თავის ქალიშვილს, ანას უბოძა მზითევში. დღეს აქ ვიზიტი საგანმანათლებლო და სათავგადასავლო გამოცდილებას აერთიანებს სუბტროპიკული ლანდშაფტების ფონზე.

დროა, ხელახლა აღმოაჩინოთ საქართველო და გურიის სუფთა ჰაერზე, ტრადიციულ გარემოში, ერთი ფინჯანი ნამდვილი ქართული ჩაით დატკბეთ.